Fa'apotopotoga a le Atua Samoa

From Wikipedia
Jump to navigation Jump to search
Fa'apotopotoga a le Atua Samoa

O le Ekalesia Aoao o le Fa'apotopotoga a le Atua Samoa po'o le World Samoan Assemblies of God Fellowship o se ekalesia pito sili ona to'atele i le lalolagi e ala i le tala'iga fa'a-le-penetekoso. O lenei lava ekalesia o lo'o i lalo o le fa'amalu tele o le Fa'apotopotoga a le Atua i Amerika po'o le Assemblies of God.. O lenei foi galuega na amataina i lalo o le va'aiga a le Susuga i le Fa'afeagaiga ia Pastor Max Haleck Jnr le ta'ita'i aoao o le Ekalesia i le Lalolagi, seia o'o ina vala'auina e ia e lona Atua i le tausaga 2006, ma o iina na loto fa'atasi ai le mamalu o le komiti fa'afoe aoao ina ia avea le Susuga ia Pastor Samani Pulepule ma ta'ita'i aoao a le lalolagi. E tusa ua 43 tausaga talu ona ta'ita'ia e le Susuga ia Samani Pulepule le matāgaluega i Niu Sila, ae ua lua tausaga i le nofoa o le ta'ita'i aoao a le lalolagi, ma o lo'o va'aia pea le fa'amalologa a le Atua i lana auauna, aemaise le faletua ma le Ekalesia i Aukilani.

O ekalesia o le Fa'apotopotoga a le Atua i le Lalolagi po'o le Assemblies of God Worldwide, e tusa nei ona 283,413 ekalesia i atunu'u e 200 i le lalolagi atoa, ma o le aofa'i o tagata tapua'i, e 60 miliona. A'o le mafutaga, po'o le itu tino a Samoa, e to'a 500 ekalesia Samoa i le lalolagi atoa, ae ova atu i le 97,000 tagata tapua'i ma o lo'o tupu pea ma ola le galuega i lalo le fa'au'uga a le Atua e le gata i Samoa, ma Amerika Samoa, a'o nisi o atunu'u o lo'o aumau ai lenei fa'alapotopotoga . E tolu A'oga Tusi Paia a lenei lava fa'alapotopotoga, o lo'o iai nei lava i Tutuila i Tafuna, ae lua i totonu o Samoa (tasi i Savai'i, tasi i Upolu)

Amataga o le Galuega a le Atua[Teuteu | edit source]

'O lenei lava fa'alapotopotoga na amata mai i Amerika i le tausaga 1914, i le mea o ta'ua o le "Azusa Street Revival" na papatisoina ai tagata i le Agaga Paia e afua mai i le tautala i gagana ese'ese, fa'amalologa o tagata mama'i ma nisi vavega tetele na faia e i latou uma na papatisoina i le Agaga Paia.

I le tausaga 1928 na o'o mai ai le tapuaiga fa'a-penetekoso i lau'ele'ele o Amerika Samoa e le Susuga ia Rev. Herman Winkleman le misionare a le ekalesia o le Fa'apotopotoga a le Atua. Na toe foi Rev. Herman Winkleman i Amerika, ona a'auina mai e le ekalesia i Amerika le Susuga ia Rev. Maurice Luce, na taliaina e ia e le ekalesia ua fa'aigoaina o le Ekalesia Fa'apotopotoga o Iesu, o se mafutaga na ō ese mai le ekalesia L.M.S, ma o iina na amata ai le Ekalesia Penetekoso ua fa'aigoaina o le Fa'apotopotoga a le Atua Samoa.

Mai lava le tausaga 1928 e o'o mai i le taimi lenei, o lo'o salalau lenei fa'alapotopotoga i itu e fa o le kelope.

Na amata i Amerika Samoa le galuega a le Atua, ona alu atu lea le tala lelei i Samoa i Sisifo ma o iina na tupu ai le galuega a le Atua i lalo o le ta'ita'iga o le Agaga Paia.

Nofoa a le Ta'ita'i Aoao[Teuteu | edit source]

I le amataga o lenei Ekalesia, na avea ai Pastor Max Haleck Jnr (mai Amerika Samoa) ma ta'ita'i aoao o le Ekalesia. I le tausaga e 2006 na vala'auina ai lenei auauna e lona Atua, sa leai se manatu po'o ai o le a tu i lenei nofoa, ona o le fa'aiuga o le tausaga 2006 na usuia ai le Fonotele a le Lalolagi i totonu o Samoa. Na fai le fono a ta'ita'i o matagaluega ta'itasi, ma i le po mulimuli o le fono 2006, na avea ai le susuga o Si'upapa Vaovasa le ta'ita'i o le matagluega i Hawai'i ma sui o le Komiti Aoao, ma o iina na maua mai ai le tali, ua avea le Susuga ia Samani Pulepule ma Ta'ita'i Aoao o le lalolagi.

Susuga ia Samani Pulepule ma le Tinā ia Sapapali'i

I le amataga o le galuega i Niu Sila, na o'o mai ai Samani Pulepule ma lona faletua Sapapali'i i laumua o Niu Sila, na na o mai e asi le galuega, a'o vaaia e le susuga ia Makisua Fatialofa le galuega i Niu Sila, e le'i mautu mea uma, o le ulua'i ekalesia i Niu Sila na amata i Ueligitone, ua tupu lea galuega ona amata ai loa ona vaelua le ekalesia, tasi i Ueligitone, tasi i Porirua. O Porirua foi na faifeau ai le Susuga ia Fereti Ama, o se toa o le Atua lenei tagata.

I'u atu ina o'o i Aukilani lenei fa'alapotopotoga, o maua atu tala o fai a'oga tusi paia i totonu o Magele, ua toe foi Makisua Fatialofa ma le Tina ia Mauosamoa i Samoa, ma ua fai palota a Niu Sila, sa latou manana'o lava ia toe foi mai le susuga ia Makisua e ta'ita'ia le galuega, peita'i ane ua le mafai ona o le galuega i Samoa, sa tu'u i talosaga e le matagaluega o Niu Sila, se naunautaiga ina ia auina mai e le Atua se tasi e ta'ita'ia le galuega. Na tali mai le Atua, ma na toe foi mai le Susuga ia Samani Pulepule i Niu Sila, ma fa'atuina se Ekalesia i Grey Lynn, mao iina na fa'au'uina ai o ia i le fono i Ueligitone e fai ai ma ta'ita'i aoao o le Matagaluega Fa'apotopotoga a le Atua Samoa i Niu Sila.

Ua atili ona tupu pea ma ola lenei Ekalesia, sa latou silafia foi, o lo'o tutusa le la talitonuga ma le fa'amalu tele o le Assemblies of God in New Zealand. O Grey Lynn Samoan Assembly of God (suia le latou igoa ia Auckland Samoan Assembly of God i le tausaga 1997), o le ekalesia muamua lava na avea ma itu tino o le fa'amalu tele o le itu papalagi. O iina foi, na finagalo ai le mamalu o le Komiti o le Assemblies of God in New Zealand ia fai ai Pastor Samani Pulepule ma sui o le ekalesia Samoa i le Komiti Laua'itele e aofia uma ai ma lotu AOG Papalagi, Fiti, Toga, Korea ma atunu'u 'ese'ese o lo'o galulue i totonu o Niu Sila (AOGNZ).

Tausaga e 2005 sa fa'apea ona 89 Ekalesia Samoa i totonu o Niu Sila, ma sa iai foi ni manatu a nisi e o ese mai le itu laua'itele ae fa'afouina se tusi tulafono a le ekalesia, ia faia lava e Samoa, le galuega a Samoa. Peita'i ane, ua vaeluaina ni manatu, ma sa tu'u atu i le Atua ona ua mana'omia se fesoasoani. O lenei lava vaitaimi ua amata ona luluina le ekalesia i Niu Sila, ma ua i'u ona o ese ni ekalesia e 45 e avea ma se ekalesia tuto'atasi. Ae na'o le 40 lava o ekalesia sa manana'o lava e nonofo i lalo o lea faamalu i lalo le ta'ita'iga o Pastor Aila'ula'u Faletutulu. E tusa la ua lua nei galuega i Niu Sila.

Ua 46 tausaga, talu ona ta'ita'ia e Pastor Samani Pulepule le matagaluega i Niu Sila, e le gata o ia o le ta'ita'i aoao o le lalolagi, ma le ta'ita'i aoao o le Ekalesia i Niu Sila, a'o se Tama i totonu o le galuega, o lo'o vaaia e ia le galuega o Auckland Samoan Assembly of God Inc. ma ua 89 matafale i lena ekalesia. O lo'o faia pea le Fonotatalo a Tina uma i totonu o Niu Sila i po uma o le Aso Lua, ina ia tatalo mo le galuega, ma ia iai pea le fa'amalologa a le Atua i le Tama o le Ekalesia.

Tusi Fa'avae a le Ekalesia[Teuteu | edit source]

E sefulu ma le ono (16) talitonuga a lenei lava Ekalesia, ma ina ua mae'a le fa'atuina o le ulua'i Ekalesia, sa fa'apea ona fono iai le Komiti Aoao ina ia faia se tusi fa'avae a le tatou Ekalesia i o latou talitonuga, e tusa e sefulu ma le ono talitonuga, ae fa (4) talitonuga o lo'o fa'amamafaina e lenei lava fa'alapotopotoga.

  • Le fa'aolataga ia Iesu Keriso
  • Papatisoina i le Agaga Paia
  • Fa'amalologa o ma'i
  • Le toe foi fa'alua mai o Iesu

Talitonuga a le Ekalesia

1. O le Upu a le Atua - O le Feagaiga Tuai ma le Feagaiga Fou, o tusi ia o lo'o iai folafolaga moni a le Atua, tatou te mafaia ona fa'alogo i lona leo e ala i lona upu, e fa'aaogaina foi le upu e fa'amasino lava ia te i tatou lava. O le pelu o le Agaga foi ia. (2 Timoteo 3:15-17, 1 Tesalonia 2:13, 2 Peteru 1:21)

2. O le Atua to'atasi ia - Ua fa'ailoa mai e le Atua lava i lana afioga, o ia o le Atua o lo'o ola lava, o le na faia le lagi ma le lalolagi, o le na togiolaina i tatou, ua ia fa'aali mai foi o ia o le Tamā, ma le Alo, ma le Agaga Paia. (Teuteronome 6:4, Isaia 43:10,11, Mataio 28:19, Luka 3:22)

O le Talitonuga lea o le Fa'apotopotoga a le Atua na te fa'amalamalamaina le Atua Tolutasi i ni vaega e sefulu (10):
  • Fa'amalamalamaina tagata po'o ni vaega o le Atua Tolutasi (Mataio 28:19, 2 Korinito 13:14, Ioane 14:16-17)
  • Le gaioiga o ia tagata e to'atolu - tolu tagata, ae tasi lava le Atua (Luka 1:35, 1 Korinito 1:24, Mataio 11:25-27, Mataio 28:19, 2 Korinito 13:14, 1 Ioane 1:3-4)
  • Le Tamā, le Alo ma le Agaga Paia, ua tasi (Ioane 1:18, Ioane 15:26, Ioane 17:11, Ioane 17:21, Sakaria 14:9)
  • E galulue fa'atasi tagata e tolu ia (Ioane 5:17-30, Ioane 5:32, Ioane 5:37, Ioane 8:17,18)
  • Le suafa, o le Ali'i Iesu Keriso (Roma 1:1-3, 2 Ioane 1:3)
  • Iesu Keriso, ua ia te i tatou le Atua (Mataio 1:23, 1 Ioane 4:2, 1 Ioane 4:10, 1 Ioane 4:14, Faaaliga 1:13, Faaaliga 1:17)
  • Le suafa, o le Alo o le Atua (Mataio 1:21-23, 2 Ioane 1:3, 1 Ioane 3:8, Eperu 7:3, Eperu 1:1-13)
  • Solitulafono a le a'oa'oga o Keriso (2 Ioane 1:9, Ioane 1:1-2, Ioane 1:14, Ioane 1:18, Ioane 1:29, Ioane 1:49, 1 Ioane 2:22-23, 1 Ioane 4:1-5, Eperu 12:2)
  • Ta'utino atu o Iesu Keriso, o le Ali'i ia (Eperu 1:3, 1 Peteru 3:22, Galuega 2:32-36, Roma 14:11, 1 Korinito 15:24-28)
  • O mea uma ua i le Atua, ua i le Alo foi (Ioane 5:22-23, 1 Peteru 1:8, Faaaliga 5:6-14, Filipi 2:8-9, Faaaliga 7:9-10, Faaaliga 4:8-11)

3. Le Paia o le Ali'i o Iesu Keriso - O Iesu Keriso, o le Alo pele o le Atua. O lo'o ta'ua i ana afioga:

4. Le paū a le Tagata - Na faia e le Atua le Tagata lelei ma le Amiotonu; aua na ia fa'apea atu, "ina tatou faia ia o le tagata i lo tatou fa'atusa, ia foliga i ai tatou." Ae paga lea, ua filifili e le tagata le leaga ma o iina na paū ai, ua le gata ua o'o ia te ia le oti fa'aletino, a'o le oti fa'aleagaga, ua mafua ai na tete'a ma le Atua. (Kenese 1:26,27, Kenese 2:17, Kenese 3:6, Roma 5:12-19)

5. O le Fa'aolaina o le tagata - O le fa'aolataga mai le Atua, e maua lea e ala i le toto paia o Iesu Keriso, le Alo o le Atua.

  • Le ala i le Fa'aolataga - E maua i le ta'utino i le Atua, ma le fa'atuatua i lona Alo. I le fa'amamaina ma le fa'afouina e le Agaga Paia, ma ua ta'uamiotonuina i le Alofa mutimutivale o le Atua e ala i le fa'atuatua ma ua fai ma suli o le Atua, e ala i le fa'amoemoe i le Ola e Fa'avavau. (Luka 24:47, Ioane 3:3, Roma 10:13-15, Efeso 2:8, Tito 2:11, Tito 3:5-7)
  • Le ata moni o le soifuaga fa'aolaina - O le fa'aolataga, o se galuega i totonu o lou Agaga. (Roma 8:16)
  • A'o le galuega i fafo, e iloa ai e tagata ua sui lou olaga e ala i au amio. (Efeso 4:24, Tito 2:12)

6. Sauniuniga a le Ekalesia

  • Papatisoina i le Vai - O le Sauniga o le Papatisoga i le alu ifo i lalo o le vai, o se sauniga o lo'o ta'ua i le Tusi Paia. O i latou uma ua ta'utino ma talitonu i lona Alo, e tatau ona Papatisoina. Latou te fa'apea ifo, ua oti i latou ma Keriso, ua toe tu mai le tagata fou, ma ua ola fa'atasi ma Keriso. (Mataio 28:19, Mareko 16:16, Galuega 10:47,48, Roma 6:4)
  • Le Sakalameta po'o le Fa'amanatuga - Le Laulau a le Ali'i, e iai le --areto ma le uaina-- o le ata o le tatou mafutaga ma le Ali'i. (2 Peteru 1:4 ), o le fa'amanatuina o lona tiga ma lona oti (1 Korinito 11:26 ), ma le folafolaga o lona toe foi fa'alua mai (1 Korinito 11:26 ), ma o lo'o faia e i latou uma o e ua talitonu "seia maliu mai o ia!"

7. O le Papatisoina i le Agaga Paia - O lenei folafolaga e mo i latou uma o e ua talitonu, ma e tatau foi ona naunau iai le tagata ia maua, o le Papatisoga i le Agaga Paia ma le Afi, o le folafolaga lava a Iesu Keriso. O lenei lava mea sa masani ona tutupu i le ulua'i Ekalesia. Ma o ii ua maua ai le Mana fa'afouina i le olaga ma le olaga auauna, le tufaina o meaalofa a le Agaga Paia, e aoga i totonu o le Ekalesia. (Luka 24:49, Galuega 1:4, Galuega 1:8, 1 Korinito 12:1-31) (Galuega 8:12-17, Galuega 10:44-46, Galuega 11:14-16, Galuega 15:7-9)

O le Papatisoina i le Agaga Paia, e mafua ai ona:

  • fa'atumuina le tagata i le Agaga Paia, (Ioane 7:37-39, Galuega 4:8)
  • maua se mafutaga pito sili ona fa'amanuiaina ma le Atua (Galuega 2:43, Eperu 12:28)
  • naunau pea i le galuega a le Atua ma lona finagalo (Galuega 2:42)
  • tupu se alofa moni mo le fanau a le Atua ma le lalolagi (Mareko 16:20)

8. O fua o le tagata papatisoina i le Agaga Paia ma le Afi - O le papatisoina o tagata talitonu i le Agaga Paia ma le Afi, e afua ia ona tautatala i gagana eseese e pei ona foaiina mai e le Agaga o le gagana ia te i latou. (Galuega 2:4). O le tautala i gagana eseese, ua tutusa ma Meaalofa o le tautala i gagana ese, ae e ese foi lona taua. (1 Korinito 12:4-10, 1 Korinito 12:28)

9. Fa'apaiaga - O le Fa'apaiaga o le alo ese mai mea leaga, ma le tu'u atoa lou olaga ia pule ai le Atua. (Roma 12:1,2, 1 Tesalonia 5:23, Eperu 13:12) Ua a'oa'o mai e le Tusi Paia "o le amio lelei, a aunoa ma lea, e leai se tasi na te iloa atu le Ali'i." (Eperu 12:14) I le mana o le Agaga Paia, tatou te mafaia ai ona tatou usita'i i le folafolaga : "Ia paia outou, auā o a'u nei e paia lava a'u." (1 Peteru 1:15,16)

10. O le Ekalesia ma lona Galuega - O le Ekalesia o le tino o Keriso, o le afioaga a le Atua e ala i le Agaga, ma sauniuniga paia mo le au fa'atuatua Tala'iga. O i tatou uma o e ua fa'atuatua i le Atua, ua fanau mai i le Agaga, ma o ni vaega taua o le tino o Keriso, o lo'o tusia i le lagi. (Efeso 1:22,23, Efeso 2:22, Eperu 12:23)

Ona o le loto o le Atua ina ia saili ma fa'aola i le na leiloa, ma ia tapua'i atu ia te ia mea uma e fai manava, ma ia fausia le tino o Keriso e ala i latou o e o fa'atuatua ia te ia, o mea taua i le Ekalesia o le Fa'apotopotoga a le Atua Samoa:

  • Ia avea i tatou ma Savali a le Atua i le lalolagi. (Galuega 1:8, Mataio 28:19,20, Mareko 16:15,16)
  • Ia avea ma tino e tasi e tapua'i atu i le Atua (1 Corinthians 12:13)
  • Ia avea ma ata o le fa'amoemoe o le Ekalesia, ia fausia le tino o Keriso, ma ia atoatoa ona lelei. (Efeso 4:11-16, 1 Korinito 12:28, 1 Korinito 14:12)

E fa'amalosia e le Fa'apotopotoga a le Atua ia lava talitonuga, ona o i latou o le Ekalesia o le Feagaiga Fou, latou te manana'o ia iloa uma e tagata, le aia tatau ina ia papatisoina i le Agaga Paia, e afua ai ona:

  • E fai ai i latou ma evagelia i le mana o le Agaga Paia e fai ai vavega. (Mareko 16:15-20, Galuega 4:29-31, Eperu 2:3,4)
  • E fa'aopoopo ai se naunauta'iga i le olaga Tapua'i i le Atua. (1 Korinito 2:10-16, 1 Korinito 12, 1 Korinito 13, 1 Korinito 14)
  • Na te fa'amalosia ai i latou e galulue i lalo le ta'ita'iga o le Agaga Paia i fua ma meaalofa o le Agaga ma galuega e pei la i le Feagaiga Fou e fa'amafanafana ai le Ekalesia. (Kalatia 5:22-26, 1 Korinito 14:12, Efeso 4:11,12, 1 Korinito 12:28, Kolose 1:29)

11. Faiva - Ua tu'uina mai e lo tatou Ali'i o Iesu Keriso faiva e faia ai le galuega a le Atua:

  • Fa'aolaina le lalolagi mo ia. (Mareko 16:15-20)
  • Tapua'i i le Atua. (Ioane 4:23,24)
  • Fausiaina le tino o Keriso. (Efeso 4:11-16)

12. Fa'amalologa o Ma'i - O le fa'amalologa a le Atua, o lo'o ta'ua i tusi uma o le afioga a le Atua. Fa'amalologa o tagata mama'i o lo'o iai i fa'alavalava o Iesu, ma o se folafolaga moni mo e talitonu. (Isaia 53:4,5, Mataio 8:16,17, Iakopo 5:14-16)

13. O le Toe Afio mai o Iesu - O le toetu mai o e ua oti ia Iesu, ma le toe fa'atasiga ma i latou o e o lo'o ola, ma le mafutaga fiafia i le lagi, o le fa'amoemoe pito sili lea o le Ekalesia. (1 Tesalonia 4:16,17, Roma 8:23, Tito 2:13, 1 Korinito 15:51,52)

14. Le pule o Iesu i lalolagi - O le toe afio mai o Iesu, e aofia ai ona ave e Iesu lana Ekalesia, o le tatou fa'amoemoe lea, ae mulimuli mai le afio mai o Iesu i lalolagi ma lana au tau mo tausaga e afe. (Sakaria 14:5, Mataio 24:27, Mataio 24:30, Faaaliga 1:7, Faaaliga 19:11-14, Faaaliga 20:1-6)

  • O lenei lava Pule na te toe fa'aolaina Isaraelu, (Esekielu 37:21,22, Sefanaia 3:19,20, Roma 11:26,27)
  • na te toe fa'atupuina o le filemu. (Isaia 11:6-9, Salamo 72:3-8, Mika 4:3,4)

15. Le Fa'amasinoga - E fa'amasinoina i latou uma sa le talitonu, e fa'atuina i latou nai e ua oti, e fa'amasinoina i latou e ala i a latou galuega. O i latou uma e le o tusia o latou igoa i le Tusi o le Ola, fa'atasi ma Satani ma ana Agelu, ma le Manufeai ma perofeta pepelo, e lafoina i latou i le lepa afi o iai le taufaitagi aue ma le lilivau o nifo, o le oti fa'alua lea. (Mataio 25:46, Mareko 9:43-48, Faaaliga 19:20, Faaaliga 20:11-15, Faaaliga 21:8)

16. Le Lagi fou ma Lalolagi fou - "A e fa'atalitali i tatou i le lagi fou ma le lalolagi fou, pei o lana na folafola mai, e mau ai le amiotonu." (2 Peteru 3:13, Faaaliga 21, Faaliga 22)

Mafutaga Ta'itasi i totonu o le Ekalesia[Teuteu | edit source]

I totonu o le Ekalesia, ua iai mafutaga ua ati'ina'e e lenei fa'alapotopotoga mo le lelei o le galuega a le Atua, ae ui i lea, e galulue fa'atasi mafutaga uma ia, ina ia manuia mea uma, ma ia fa'amatagofieina galuega fai po'o tiute foi i totonu o le Ekalesia. Ma o mafutaga nei o lo'o galulue i totonu o ekalesia ta'itasi i le lalolagi atoa:

1. Mafutaga a le A'oga Aso Sa.

A'oga Aso Sa

O lenei mafutaga e aofia ai tagata uma o le ekalesia, e amata mai i le 1 tausaga e o'o atu i le 100 tausaga, afai e ova atu seisi i le 100 tausaga, ona le aofia lea o ia i le A'oga Aso Sa. O lenei mafutaga ua vaeluaina i ni vaega (divided by age). E iai foi le 'au a tagata matutua, o le A'oga Aso Sa e tatau ona faia i le taeao o Aso Sa uma lava, vagana lava aso malolo o tamaiti i le a'oga, ona malolo loa le A'oga Aso Sa, fa'ato'a a'e le A'oga Aso Sa i le taimi e a'e ai A'oga a le fanau. E muamua ona faia A'oga tusi Paia a vaesga ta'itasi, e tusa la e tasi le itula o le A'oga Aso Sa. E uma a'e le a'oa'oga o le Tusi Paia, ona faia loa lea o tauloto o vasega ta'itasi, e o e fai i luma o le fa'apotopotoga pei lava o se aitema (item) e tauva ai foi vasega ta'itasi mo le ipu o le Vasega e sili i le fa'ai'uga o le tausaga i le taimi e faia ai le laugatogi a le A'oga Aso Sa. O le Komiti foi o le A'oga Aso Sa, e tofia ai le Peresitene o le A'oga Aso Sa, ma le failautusi, ma faia'oga ta'itasi.


Tauvaga a le C.A

2. Mafutaga a le C.A (Christ' Ambassadors) po'o le Savali a Keriso

O nei mafutaga e vaeluaina ai le Ekalesia i vaega pe 3 pe 5, (e fuafua i le to'atele o le Ekalesia) e tauva ai 'au uma lava i le su'esu'eina o le Afioga a le Atua, o ta'aloga, ia ma le taulaga foi. O le Savali a Keriso (C.A) e faia i Aso To'ona'i uma lava, e fai ai su'ega a le 'au matutua ma le 'au talavou foi. O su'ega foi ia, e maua ai sou togi pe a e pasia le maka 80% i le fonotele e faia i tausaga ta'itasi, i le Laugatogi Aoao. O le Laugatogi Aoao o se tauvaga fa'aleagaga a le ekalesia, e tauva ai ekalesia ta'itasi mo le ipu a le C.A. O le C.A e fai lava i le tausaga atoa, fa'ato'a uma lenei mafutaga i taimi o le Tauvaga a le C.A e faia e Ekalesia ta'itasi, e tauva ai 'au a le ekalesia i ni pese ma siva fa'aleagaga, e o mai ai foi nisi Ekalesia e matamata i sauniuniga a le C.A, ma le fa'amasino na te fa'amasinoina le 'au e sili.



Mafutaga a Tinā


3. Mafutaga a Tinā

O le mafutaga a Tina, o se malosiaga lea i totonu o so'o se tu'aiga ekalesia, ona o le latou galulue fa'atasi, le teuina o le malumalu ae silisili, le latou naunau i le tatalo. E faia a latou fonotatalo i po o Aso Lua uma lava i le itula e 7 i le afiafi, o lenei lava sauniga e faia e atunu'u uma lava, o le taimi e fa'afeso'ota'i ai Tina uma lava i totonu o le galuega, i so'o se mea latou te aumau ai, i le Tatalo. Latou te mafuta fa'atasi i luma o le Nofoali'i o le Atua, ma tatalo mo le galuega a le Atua, ma e o lo'o ta'ita'ia le galuega. Fa'ato'a faia a latou sauniniga i Aso o Tina, e tauaveina e Tina le Sauniga, e tātā foi latou i le fa'aili, e ta'ita'ia e latou sauniga, e fai ai foi ni o latou pese ma siva fa'aleagaga, ae le gata i lea, le folafolaina o le upu a le Atua.



Mafutaga a Tamā

4. Mafutaga a Tamā

O le mafutaga a Tamā, o se mafutaga malosi lava i le galuega a le Atua, ma o le mafutaga lea e aofia ai tiakono ma a'oa'o, ma tamā uma lava o le ekalesia. O se mafutaga tāua i totonu o le Ekalesia. O le 'ulu o matāfale ta'itasi. Latou te faia le galuega a le falesa, le teuina o fafo atu o le malumalu, ma e faia a latou fonotatalo i po o le Aso Gafua. Fa'ato'a faia a latou sauniuniga i le Aso o Tamā, e tātā foi latou i le fa'aili, e tauaveina e latou sauniga, e ta'ita'ia e i latou sauniga lotu ma le folafolaina o le upu a le Atua, ma ni aitema po'o ni viiga ua latou saunia e fa'amatagofieina ai a latou sauniuniga. O i latou e fa'amoemoe ai le galuega a le Atua e fai ai ni filifiliga sa'o ae le gata i lea ia loto maulalo.





5. Mafutaga a le 'Au Talavou

'Au Talavou a Aukilani Samoan AOG

O lenei mafutaga, o se mafutaga ola tele, aua o le lumana'i lenei o le ekalesia. O se mafutaga tupu tele, ma o le naunauta'iga a lenei lava fa'alapotopotoga ina ia manuia le fanau, aua o i latou ia na te tauaveina le galuega a le Atua pe a mavae a tatou tua'ā. O sauniuniga fa'aleautalavou, o ni sauniga fa'atumuina i le Agaga Paia, ni sauniga tumu foi, ma e pule lava le ekalesia i taimi e faia ai mafutaga a le 'au talavou, o nisi e fai a latou sauniga i le po o Aso Faraile, o isi i le aoauli o le Aso To'ona'i ma isi i le afiafi o le Aso Sa, o nei sauniga uma e faia i le gagana fa'asamoa ma le gagana peratania. E tauveina foi le 'au talavou a latou sauniga, e faia foi mafutaga tele a le 'au talavou (Youth Rallies) e auai uma ai 'au talavou a ekalesia uma lava. O lenei mafutaga e tāua tele, e le gata i le faife'au, ma le ekalesia, ae tāua foi i luma o silafaga o le Atua. E lua vaega o le 'au talavou, o le 'au laiti ma le 'au talavou matutua. E fai lava polokalame a le 'au laiti, e ese atu foi i le 'au talavou matutua. Fa'ato'a o mai fa'atasi 'au ia e lua i le aso o Lotu Tamaiti (White Sunday). E gaioi 'au ia e lua e sauni atu ni viiga, ma siva fa'aleagaga, ae le gata foi i lea le folafolaina o le upu a le Atua. I taimi foi o fonotele a le Ekalesia e fai ai foi mafutaga a le 'au talavou, ae fa'apitoa lava le fonotele a le lalolagi, e o mai ai autalavou mai itu e fa o le kelope, ma mafuta fa'atasi i le suafa o Iesu, i a latou sauniuniga ua fa'aigoaina o le World Samoan Assemblies of God Youth Conference.

Fonotele a le Lalolagi[Teuteu | edit source]

Fonotele a le Fa'apotopotoga a le Atua i Samoa (2006).


O mafutaga tele a le Ekalesia e ta'itasi ona faia i tausaga e lua (every two years) ma e pule foi le Komiti a le Lalolagi i le mea e faia ai ia mafutaga. O ia mafutaga e fai ai Fonotaga a susuga i fa'afeagaiga ma faletua, e fai foi ma mafutaga o le a'oga tusi paia, ma mafutaga fa'a-le-autalavou, e iai foi ma failauga fa'apitoa mo ia sauniuniga. O lo'o saunia foi e matagaluega ta'itasi ni aitema po'o ni viiga i sauniuniga tu'u fa'atasi i le afiafi.

E tusa la e tasi le vaiaso e faia ai ia mafutaga, o ni mafutaga fa'atumuina i le Agaga Paia, o ni mafutaga to'atele foi.

Ma o le lisi lea o fonotaga ua te'a, ma le fonotaga o le a tatou aulia i le fa'aiuga o lenei tausaga 2008.

  • 1st Fonotaga a le Lalolagi 1978 na faia i Amerika Samoa
  • 2nd Fonotaga a le Lalolagi 1980 na faia i Hawaii
  • 3rd Fonotaga a le Lalolagi 1982 "Iesu le Fa'aola" na faia i Niu Sila
  • 4th Fonotaga a le Lalolagi 1984 na faia i Amerika
  • 5th Fonotaga a le Lalolagi 1986 na faia i Samoa
  • 6th Fonotaga a le Lalolagi 1988 "Ua Tasi tatou i le Agaga" na faia i Ausetalia
  • 7th Fonotaga a le Lalolagi 1990 "Taimi o le Seleselega" na faia i Hawaii
  • 8th Fonotaga a le Lalolagi 1992 "Ua uma ona ia totogi le tau" na faia i Niu Sila
  • 9th Fonotaga a le Lalolagi 1994 na faia i Samoa
  • 10th Fonotaga a le Lalolagi 1996 "Fa'amalosia e le Agaga Paia" na faia i Amerika Samoa
  • 11th Fonotaga a le Lalolagi 1998 "Le Ali'i e, se fa'aaliga mo nei ma a taeao!" na faia i Amerika
  • 12th Fonotaga a le Lalolagi 2000 Tula'i ia, ina Malamalama ia" na faia i Samoa
  • 13th Fonotaga a le Lalolagi 2002 "O le mana o le Penetekoso" na faia i Hawaii
  • 14th Fonotaga a le Lalolagi 2004 "Tatalo ma ia Usita'i" na faia i Niu Sila
  • 15th Fonotaga a le Lalolagi 2006 "O le Penetekoso mo Augatupulaga uma" na faia i Samoa.
  • 16th Fonotaga a le Lalolagi 2008 "Toe Fa'aolaola le Agaga o le Penetekoso" na faia i Niu Sila
  • 17th Fonotaga a le Lalolagi 2010 "Fa'amalosia e le Agaga Paia" na faia i Samoa

Matagaluega Ta'itasi[Teuteu | edit source]

Amerika Samoa

Ta'ita'i Aoao : Pastor Siaosi Mageo

Ekalesia : 38

Samoa

Ta'ita'i Aoao : Pastor Joe Amosa

Ekalesia : 98

Niu Sila

Pastor Samani Pulepule ma le faletua ia Sapapali'i o Ta'ita'i Aoao o le Fa'apotopotoga a le Atua Samoa

Ta'ita'i Aoao : Pastor Motu Matia

Ekalesia : 55

Ausetalia

Ta'ita'i Aoao : Pastor Onesemo Pulepule

Ekalesia : 48

Amerika

Ta'ita'i Aoao : Pastor Tu'ugasala U. Fuga

Ekalesia : 76

Hawaii

Ta'ita'i Aoao : Pastor Eteuati Lafaele

Ekalesia : 36

Alaska

Ta'ita'i Aoao : Pastor Talosaga Vanilau

Ekalesia : 17

Nisi Ekalesia Penetekoso Samoa[Teuteu | edit source]

E to'atele nisi Ekalesia na amata i lenei lava fa'alapotopotoga, ae na ō ese e fa'atū a latou galuega, ae ui i lea, o lo'o tutusa pea talitonuga ma le Fa'apotopotoga a le Atua Samoa ma o lo'o fa'apea ona galulue fa'atasi. Ma o nisi ekalesia ia, e fai lava a latou fono:

  • Samoan Independent Assemblies of God in New Zealand
  • First Samoan Assembly of God in New Zealand
  • Assembly of God Church of Samoa
    Malumalu Tele o le Fa'apotopotoga a le Atua i Lotopā, Apia, Samoa.
  • Samoan Church of God
  • Samoan Christian Churches
  • Samoa Worship Centre
  • Samoan Bethel Prayer Centre
  • Alofatunoa Pentecostal Ministries
  • Peace Chapel
  • Samoan Open Brethren Assembly
  • Au Uso Kerisiano
  • Voice of Christ, Samoan Church
  • Samoan Church of Pentecost
  • Bread of Life Samoan Church
  • Samoan Full Gospel Church
  • First Samoan Full Gospel Pentecostal Church Incorporated
  • Worldwide Samoan Baptist Church
  • Samoan Hosannah Church
  • Samoan Breakthrough Church
  • Samoan Destiny Church