Faʻaliliuga

Rosetta stone

ʻO le faʻaliliutusi (poʻo le faʻamatalaʻupu foʻi) e lē ʻo se mea faigōfie. E aofia i le faʻaliliutusi vāega tāua e pei o gagana e lua e tutusa o lā mālolosi, loloto ma le poto lautele, ʻaemaise lava le silafia loloto o tū ma aga a lalolagi o gagana ia e lua. ʻO le vāega lea mulimuli o aganuʻu poʻo tū ma aga, e tele faʻafītāuli e tūlaʻi mai ai. ʻAe ʻo le isi foʻi itū, ʻo tagata e mālolosi ʻuma a lātou gagana e lua faʻapēnā foʻi lo lātou lelei i tū ma aga poʻo aganuʻu foʻi a gagana ia e lua, ʻo latou nei e mafai ona faʻaliliu mai i le isi gagana i le isi gagana e aunoa ma ni faʻafītāuli e tele. ʻAe ui lava i lea, e faʻamālosiʻau atu ʻina ʻia ʻaua le fefe, ʻae taumafai, ʻae ʻo le mea tāua, tusa lava pē lelei i gagana e lua, ʻina ʻia taumulimuli i ni alafua aogā e ʻāmata ai. Muamua,ʻo se tasi e fia faʻaliliu mai i le gagana Samoa i le gagana ʻIgilisi, e tatau lava ona lelei lana gagana faʻaperetānia poʻo le ʻIgilisi; lona lua, e tatau ona iai ni ana tusi poʻo ni alagāʻoa lelei silisili e tua ʻi ai ʻauā le saʻiliga o faʻamālamalamaga o konisepi poʻo manatu poʻo talitonuga faʻavae,faʻaʻupuga mmf (ma isi mea faʻapēnā) e manaʻomia lo latou faʻamālamalamaina. ʻUa naʻo ni vāega ʻāmata nei o le tomai poʻo gāluega faʻaliliutusi.

E tele ni vāega aogā o le gagana Sāmoa e faʻaaogā ai le faʻaliliuga mo aso nei. ʻO le māfuaʻaga, ʻona ʻua fiailoa e tupulaga mea e uiga i le gagana ma le aganuʻu Sāmoa, ʻae lē mālamalama i le gagana Sāmoa. ʻO se tasi o nei vāega tāua, ʻo tala o le vavau (myths & legends).