Faʻapotopotoga a le Atua Samoa

O le Ekalesia Aoao o le Faʻapotopotoga a le Atua Samoa poʻo le World Samoan Assemblies of God Fellowship o se ekalesia pito sili ona toʻatele i le lalolagi e ala i le talaʻiga faʻa-le-penetekoso. O lenei lava ekalesia o loʻo i lalo o le faʻamalu tele o le Faʻapotopotoga a le Atua i Amerika poʻo le Assemblies of God..

O lenei foi galuega na amataina i lalo o le vaʻaiga a le Susuga i le Faʻafeagaiga ia Pastor Max Haleck Jnr le taʻitaʻi aoao o le Ekalesia i le Lalolagi, seia oʻo ina valaʻauina e ia e lona Atua i le tausaga 2006, ma o iina na loto faʻatasi ai le mamalu o le komiti faʻafoe aoao ina ia avea le Susuga ia Pastor Samani Pulepule ma taʻitaʻi aoao a le lalolagi. E tusa ua 43 tausaga talu ona taʻitaʻia e le Susuga ia Samani Pulepule le matāgaluega i Niu Sila, ae ua lua tausaga i le nofoa o le taʻitaʻi aoao a le lalolagi, ma o loʻo vaʻaia pea le faʻamalologa a le Atua i lana auauna, aemaise le faletua ma le Ekalesia i Aukilani.

O ekalesia o le Faʻapotopotoga a le Atua i le Lalolagi poʻo le Assemblies of God Worldwide, e tusa nei ona 283,413 ekalesia i atunuʻu e 200 i le lalolagi atoa, ma o le aofaʻi o tagata tapuaʻi, e 60 miliona.

Aʻo le mafutaga, poʻo le itu tino a Samoa, e toʻa 500 ekalesia Samoa i le lalolagi atoa, ae ova atu i le 97,000 tagata tapuaʻi ma o loʻo tupu pea ma ola le galuega i lalo le faʻauʻuga a le Atua e le gata i Samoa, ma Amerika Samoa, aʻo nisi o atunuʻu o loʻo aumau ai lenei faʻalapotopotoga.

E tolu Aʻoga Tusi Paia a lenei lava faʻalapotopotoga, o loʻo iai nei lava i Tutuila i Tafuna, ae lua i totonu o Samoa (tasi i Savaiʻi, tasi i Upolu)

Amataga o le Galuega a le Atua

ʻO lenei lava faʻalapotopotoga na amata mai i Amerika i le tausaga 1914, i le mea o taʻua o le "Azusa Street Revival" na papatisoina ai tagata i le Agaga Paia e afua mai i le tautala i gagana eseʻese, faʻamalologa o tagata mamaʻi ma nisi vavega tetele na faia e i latou uma na papatisoina i le Agaga Paia.

I le tausaga 1928 na oʻo mai ai le tapuaiga faʻa-penetekoso i lauʻeleʻele o Amerika Samoa e le Susuga ia Rev. Herman Winkleman le misionare a le ekalesia o le Faʻapotopotoga a le Atua. Na toe foi Rev. Herman Winkleman i Amerika, ona aʻauina mai e le ekalesia i Amerika le Susuga ia Rev. Maurice Luce, na taliaina e ia e le ekalesia ua faʻaigoaina o le Ekalesia Faʻapotopotoga o Iesu, o se mafutaga na ō ese mai le ekalesia L.M.S, ma o iina na amata ai le Ekalesia Penetekoso ua faʻaigoaina o le Faʻapotopotoga a le Atua Samoa.

Mai lava le tausaga 1928 e oʻo mai i le taimi lenei, o loʻo salalau lenei faʻalapotopotoga i itu e fa o le kelope.

Na amata i Amerika Samoa le galuega a le Atua, ona alu atu lea le tala lelei i Samoa i Sisifo ma o iina na tupu ai le galuega a le Atua i lalo o le taʻitaʻiga o le Agaga Paia.

Nofoa a le Taʻitaʻi Aoao

I le amataga o lenei Ekalesia, na avea ai Pastor Max Haleck Jnr (mai Amerika Samoa) ma taʻitaʻi aoao o le Ekalesia. I le tausaga e 2006 na valaʻauina ai lenei auauna e lona Atua, sa leai se manatu poʻo ai o le a tu i lenei nofoa, ona o le faʻaiuga o le tausaga 2006 na usuia ai le Fonotele a le Lalolagi i totonu o Samoa. Na fai le fono a taʻitaʻi o matagaluega taʻitasi, ma i le po mulimuli o le fono 2006, na avea ai le susuga o Siʻupapa Vaovasa le taʻitaʻi o le matagluega i Hawaiʻi ma sui o le Komiti Aoao, ma o iina na maua mai ai le tali, ua avea le Susuga ia Samani Pulepule ma Taʻitaʻi Aoao o le lalolagi.

I le amataga o le galuega i Niu Sila, na oʻo mai ai Samani Pulepule ma lona faletua Sapapaliʻi i laumua o Niu Sila, na na o mai e asi le galuega, aʻo vaaia e le susuga ia Makisua Fatialofa le galuega i Niu Sila, e leʻi mautu mea uma, o le uluaʻi ekalesia i Niu Sila na amata i Ueligitone, ua tupu lea galuega ona amata ai loa ona vaelua le ekalesia, tasi i Ueligitone, tasi i Porirua. O Porirua foi na faifeau ai le Susuga ia Fereti Ama, o se toa o le Atua lenei tagata.

Iʻu atu ina oʻo i Aukilani lenei faʻalapotopotoga, o maua atu tala o fai aʻoga tusi paia i totonu o Magele, ua toe foi Makisua Fatialofa ma le Tina ia Mauosamoa i Samoa, ma ua fai palota a Niu Sila, sa latou mananaʻo lava ia toe foi mai le susuga ia Makisua e taʻitaʻia le galuega, peitaʻi ane ua le mafai ona o le galuega i Samoa, sa tuʻu i talosaga e le matagaluega o Niu Sila, se naunautaiga ina ia auina mai e le Atua se tasi e taʻitaʻia le galuega. Na tali mai le Atua, ma na toe foi mai le Susuga ia Samani Pulepule i Niu Sila, ma faʻatuina se Ekalesia i Grey Lynn, mao iina na faʻauʻuina ai o ia i le fono i Ueligitone e fai ai ma taʻitaʻi aoao o le Matagaluega Faʻapotopotoga a le Atua Samoa i Niu Sila.

Ua atili ona tupu pea ma ola lenei Ekalesia, sa latou silafia foi, o loʻo tutusa le la talitonuga ma le faʻamalu tele o le Assemblies of God in New Zealand. O Grey Lynn Samoan Assembly of God (suia le latou igoa ia Auckland Samoan Assembly of God i le tausaga 1997), o le ekalesia muamua lava na avea ma itu tino o le faʻamalu tele o le itu papalagi. O iina foi, na finagalo ai le mamalu o le Komiti o le Assemblies of God in New Zealand ia fai ai Pastor Samani Pulepule ma sui o le ekalesia Samoa i le Komiti Lauaʻitele e aofia uma ai ma lotu AOG Papalagi, Fiti, Toga, Korea ma atunuʻu ʻeseʻese o loʻo galulue i totonu o Niu Sila (AOGNZ).

Tausaga e 2005 sa faʻapea ona 89 Ekalesia Samoa i totonu o Niu Sila, ma sa iai foi ni manatu a nisi e o ese mai le itu lauaʻitele ae faʻafouina se tusi tulafono a le ekalesia, ia faia lava e Samoa, le galuega a Samoa. Peitaʻi ane, ua vaeluaina ni manatu, ma sa tuʻu atu i le Atua ona ua manaʻomia se fesoasoani. O lenei lava vaitaimi ua amata ona luluina le ekalesia i Niu Sila, ma ua iʻu ona o ese ni ekalesia e 45 e avea ma se ekalesia tutoʻatasi. Ae naʻo le 40 lava o ekalesia sa mananaʻo lava e nonofo i lalo o lea faamalu i lalo le taʻitaʻiga o Pastor Ailaʻulaʻu Faletutulu. E tusa la ua lua nei galuega i Niu Sila.

Ua 46 tausaga, talu ona taʻitaʻia e Pastor Samani Pulepule le matagaluega i Niu Sila, e le gata o ia o le taʻitaʻi aoao o le lalolagi, ma le taʻitaʻi aoao o le Ekalesia i Niu Sila, aʻo se Tama i totonu o le galuega, o loʻo vaaia e ia le galuega o Auckland Samoan Assembly of God Inc. ma ua 89 matafale i lena ekalesia. O loʻo faia pea le Fonotatalo a Tina uma i totonu o Niu Sila i po uma o le Aso Lua, ina ia tatalo mo le galuega, ma ia iai pea le faʻamalologa a le Atua i le Tama o le Ekalesia.

Tusi Faʻavae a le Ekalesia

E sefulu ma le ono (16) talitonuga a lenei lava Ekalesia, ma ina ua maeʻa le faʻatuina o le uluaʻi Ekalesia, sa faʻapea ona fono iai le Komiti Aoao ina ia faia se tusi faʻavae a le tatou Ekalesia i o latou talitonuga, e tusa e sefulu ma le ono talitonuga, ae fa (4) talitonuga o loʻo faʻamamafaina e lenei lava faʻalapotopotoga.

Le faʻaolataga ia Iesu Keriso

Papatisoina i le Agaga Paia

Faʻamalologa o maʻi

Le toe foi faʻalua mai o Iesu

Talitonuga a le Ekalesia

1. O le Upu a le Atua – o le Feagaiga Tuai ma le Feagaiga Fou, o tusi ia o loʻo iai folafolaga moni a le Atua, tatou te mafaia ona faʻalogo i lona leo e ala i lona upu, e faʻaaogaina foi le upu e faʻamasino lava ia te i tatou lava. O le pelu o le Agaga foi ia. (2 Timoteo 3:15-17, 1 Tesalonia 2:13, 2 Peteru 1:21)

2. O le Atua toʻatasi ia – ua faʻailoa mai e le Atua lava i lana afioga, o ia o le Atua o loʻo ola lava, o le na faia le lagi ma le lalolagi, o le na togiolaina i tatou, ua ia faʻaali mai foi o ia o le Tamā, ma le Alo, ma le Agaga Paia. (Teuteronome 6:4, Isaia 43:10,11, Mataio 28:19, Luka 3:22)

O le Talitonuga lea o le Faʻapotopotoga a le Atua na te faʻamalamalamaina le Atua Tolutasi i ni vaega e sefulu (10):

Faʻamalamalamaina tagata poʻo ni vaega o le Atua Tolutasi (Mataio 28:19, 2 Korinito 13:14, Ioane 14:16-17)
Le gaioiga o ia tagata e toʻatolu – tolu tagata, ae tasi lava le Atua (Luka 1:35, 1 Korinito 1:24, Mataio 11:25-27, Mataio 28:19, 2 Korinito 13:14, 1 Ioane 1:3-4)
Le Tamā, le Alo ma le Agaga Paia, ua tasi (Ioane 1:18, Ioane 15:26, Ioane 17:11, Ioane 17:21, Sakaria 14:9)
E galulue faʻatasi tagata e tolu ia (Ioane 5:17-30, Ioane 5:32, Ioane 5:37, Ioane 8:17,18)
Le suafa, o le Aliʻi Iesu Keriso (Roma 1:1-3, 2 Ioane 1:3)
Iesu Keriso, ua ia te i tatou le Atua (Mataio 1:23, 1 Ioane 4:2, 1 Ioane 4:10, 1 Ioane 4:14, Faaaliga 1:13, Faaaliga 1:17)
Le suafa, o le Alo o le Atua (Mataio 1:21-23, 2 Ioane 1:3, 1 Ioane 3:8, Eperu 7:3, Eperu 1:1-13)
Solitulafono a le aʻoaʻoga o Keriso (2 Ioane 1:9, Ioane 1:1-2, Ioane 1:14, Ioane 1:18, Ioane 1:29, Ioane 1:49, 1 Ioane 2:22-23, 1 Ioane 4:1-5, Eperu 12:2)
Taʻutino atu o Iesu Keriso, o le Aliʻi ia (Eperu 1:3, 1 Peteru 3:22, Galuega 2:32-36, Roma 14:11, 1 Korinito 15:24-28)
O mea uma ua i le Atua, ua i le Alo foi (Ioane 5:22-23, 1 Peteru 1:8, Faaaliga 5:6-14, Filipi 2:8-9, Faaaliga 7:9-10, Faaaliga 4:8-11)

3. Le Paia o le Aliʻi o Iesu Keriso – o Iesu Keriso, o le Alo pele o le Atua. O loʻo taʻua i ana afioga:

Lona Fanau mai i le Taupou (Mataio 1:23, Luka 1:31, Luka 1:35)
Lona Olaga Amiotonu (Eperu 7:26, 1 Peteru 2:22)
Ona Vavega na ia faia (Galuega 2:22, Galuega 10:38)
Lana Galuega na fai (1 Korinito 15:3, 2 Korinito 5:21)
Lona Maliu ma lona toetu mai (Mataio 28:6, Luka 24:39, 1 Korinito 15:4)
Lona afio aʻe i le itu taumatau o le nofoaliʻi o le Atua (Galuega 1:9, Galuega 1:11, Galuega 2:33, Filipi 2:9-11, Eperu 1:3)

4. Le paū a le Tagata – na faia e le Atua le Tagata lelei ma le Amiotonu; aua na ia faʻapea atu, "ina tatou faia ia o le tagata i lo tatou faʻatusa, ia foliga i ai tatou." Ae paga lea, ua filifili e le tagata le leaga ma o iina na paū ai, ua le gata ua oʻo ia te ia le oti faʻaletino, aʻo le oti faʻaleagaga, ua mafua ai na teteʻa ma le Atua. (Kenese 1:26,27, Kenese 2:17, Kenese 3:6, Roma 5:12-19)

5. O le Faʻaolaina o le tagata – o le faʻaolataga mai le Atua, e maua lea e ala i le toto paia o Iesu Keriso, le Alo o le Atua.

Le ala i le Faʻaolataga – e maua i le taʻutino i le Atua, ma le faʻatuatua i lona Alo. I le faʻamamaina ma le faʻafouina e le Agaga Paia, ma ua taʻuamiotonuina i le Alofa mutimutivale o le Atua e ala i le faʻatuatua ma ua fai ma suli o le Atua, e ala i le faʻamoemoe i le Ola e Faʻavavau. (Luka 24:47, Ioane 3:3, Roma 10:13-15, Efeso 2:8, Tito 2:11, Tito 3:5-7)
Le ata moni o le soifuaga faʻaolaina – o le faʻaolataga, o se galuega i totonu o lou Agaga. (Roma 8:16)
Aʻo le galuega i fafo, e iloa ai e tagata ua sui lou olaga e ala i au amio. (Efeso 4:24, Tito 2:12)

6. Sauniuniga a le Ekalesia

Papatisoina i le Vai – o le Sauniga o le Papatisoga i le alu ifo i lalo o le vai, o se sauniga o loʻo taʻua i le Tusi Paia. O i latou uma ua taʻutino ma talitonu i lona Alo, e tatau ona Papatisoina. Latou te faʻapea ifo, ua oti i latou ma Keriso, ua toe tu mai le tagata fou, ma ua ola faʻatasi ma Keriso. (Mataio 28:19, Mareko 16:16, Galuega 10:47,48, Roma 6:4)

Le Sakalameta poʻo le Faʻamanatuga – Le Laulau a le Aliʻi, e iai le --areto ma le uaina-- o le ata o le tatou mafutaga ma le Aliʻi. (2 Peteru 1:4 ), o le faʻamanatuina o lona tiga ma lona oti (1 Korinito 11:26 ), ma le folafolaga o lona toe foi faʻalua mai (1 Korinito 11:26 ), ma o loʻo faia e i latou uma o e ua talitonu "seia maliu mai o ia!"

7. O le Papatisoina i le Agaga Paia – o lenei folafolaga e mo i latou uma o e ua talitonu, ma e tatau foi ona naunau iai le tagata ia maua, o le Papatisoga i le Agaga Paia ma le Afi, o le folafolaga lava a Iesu Keriso. O lenei lava mea sa masani ona tutupu i le uluaʻi Ekalesia. Ma o ii ua maua ai le Mana faʻafouina i le olaga ma le olaga auauna, le tufaina o meaalofa a le Agaga Paia, e aoga i totonu o le Ekalesia. (Luka 24:49, Galuega 1:4, Galuega 1:8, 1 Korinito 12:1-31) (Galuega 8:12-17, Galuega 10:44-46, Galuega 11:14-16, Galuega 15:7-9)O le Papatisoina i le Agaga Paia, e mafua ai ona:

faʻatumuina le tagata i le Agaga Paia, (Ioane 7:37-39, Galuega 4:8)
maua se mafutaga pito sili ona faʻamanuiaina ma le Atua (Galuega 2:43, Eperu 12:28)
naunau pea i le galuega a le Atua ma lona finagalo (Galuega 2:42)
tupu se alofa moni mo le fanau a le Atua ma le lalolagi (Mareko 16:20)

8. O fua o le tagata papatisoina i le Agaga Paia ma le Afi – o le papatisoina o tagata talitonu i le Agaga Paia ma le Afi, e afua ia ona tautatala i gagana eseese e pei ona foaiina mai e le Agaga o le gagana ia te i latou. (Galuega 2:4). O le tautala i gagana eseese, ua tutusa ma Meaalofa o le tautala i gagana ese, ae e ese foi lona taua. (1 Korinito 12:4-10, 1 Korinito 12:28)

9. Faʻapaiaga – o le Faʻapaiaga o le alo ese mai mea leaga, ma le tuʻu atoa lou olaga ia pule ai le Atua. (Roma 12:1,2, 1 Tesalonia 5:23, Eperu 13:12) Ua aʻoaʻo mai e le Tusi Paia "o le amio lelei, a aunoa ma lea, e leai se tasi na te iloa atu le Aliʻi." (Eperu 12:14) I le mana o le Agaga Paia, tatou te mafaia ai ona tatou usitaʻi i le folafolaga : "Ia paia outou, auā o aʻu nei e paia lava aʻu." (1 Peteru 1:15,16)

10. O le Ekalesia ma lona Galuega – o le Ekalesia o le tino o Keriso, o le afioaga a le Atua e ala i le Agaga, ma sauniuniga paia mo le au faʻatuatua Talaʻiga. O i tatou uma o e ua faʻatuatua i le Atua, ua fanau mai i le Agaga, ma o ni vaega taua o le tino o Keriso, o loʻo tusia i le lagi. (Efeso 1:22,23, Efeso 2:22, Eperu 12:23)

Ona o le loto o le Atua ina ia saili ma faʻaola i le na leiloa, ma ia tapuaʻi atu ia te ia mea uma e fai manava, ma ia fausia le tino o Keriso e ala i latou o e o faʻatuatua ia te ia, o mea taua i le Ekalesia o le Faʻapotopotoga a le Atua Samoa:

Ia avea i tatou ma Savali a le Atua i le lalolagi. (Galuega 1:8, Mataio 28:19,20, Mareko 16:15,16)
Ia avea ma tino e tasi e tapuaʻi atu i le Atua (1 Corinthians 12:13)
Ia avea ma ata o le faʻamoemoe o le Ekalesia, ia fausia le tino o Keriso, ma ia atoatoa ona lelei. (Efeso 4:11-16, 1 Korinito 12:28, 1 Korinito 14:12)

E faʻamalosia e le Faʻapotopotoga a le Atua ia lava talitonuga, ona o i latou o le Ekalesia o le Feagaiga Fou, latou te mananaʻo ia iloa uma e tagata, le aia tatau ina ia papatisoina i le Agaga Paia, e afua ai ona:

E fai ai i latou ma evagelia i le mana o le Agaga Paia e fai ai vavega. (Mareko 16:15-20, Galuega 4:29-31, Eperu 2:3,4)
E faʻaopoopo ai se naunautaʻiga i le olaga Tapuaʻi i le Atua. (1 Korinito 2:10-16, 1 Korinito 12, 1 Korinito 13, 1 Korinito 14)
Na te faʻamalosia ai i latou e galulue i lalo le taʻitaʻiga o le Agaga Paia i fua ma meaalofa o le Agaga ma galuega e pei la i le Feagaiga Fou e faʻamafanafana ai le Ekalesia. (Kalatia 5:22-26, 1 Korinito 14:12, Efeso 4:11,12, 1 Korinito 12:28, Kolose 1:29)

11. Faiva – ua tuʻuina mai e lo tatou Aliʻi o Iesu Keriso faiva e faia ai le galuega a le Atua:

Faʻaolaina le lalolagi mo ia. (Mareko 16:15-20)
Tapuaʻi i le Atua. (Ioane 4:23,24)
Fausiaina le tino o Keriso. (Efeso 4:11-16)

12. Faʻamalologa o Maʻi – o le faʻamalologa a le Atua, o loʻo taʻua i tusi uma o le afioga a le Atua. Faʻamalologa o tagata mamaʻi o loʻo iai i faʻalavalava o Iesu, ma o se folafolaga moni mo e talitonu. (Isaia 53:4,5, Mataio 8:16,17, Iakopo 5:14-16)

13. O le Toe Afio mai o Iesu – o le toetu mai o e ua oti ia Iesu, ma le toe faʻatasiga ma i latou o e o loʻo ola, ma le mafutaga fiafia i le lagi, o le faʻamoemoe pito sili lea o le Ekalesia. (1 Tesalonia 4:16,17, Roma 8:23, Tito 2:13, 1 Korinito 15:51,52)

14. Le pule o Iesu i lalolagi – o le toe afio mai o Iesu, e aofia ai ona ave e Iesu lana Ekalesia, o le tatou faʻamoemoe lea, ae mulimuli mai le afio mai o Iesu i lalolagi ma lana au tau mo tausaga e afe. (Sakaria 14:5, Mataio 24:27, Mataio 24:30, Faaaliga 1:7, Faaaliga 19:11-14, Faaaliga 20:1-6)

O lenei lava Pule na te toe faʻaolaina Isaraelu, (Esekielu 37:21,22, Sefanaia 3:19,20, Roma 11:26,27)
na te toe faʻatupuina o le filemu. (Isaia 11:6-9, Salamo 72:3-8, Mika 4:3,4)

15. Le Faʻamasinoga – e faʻamasinoina i latou uma sa le talitonu, e faʻatuina i latou nai e ua oti, e faʻamasinoina i latou e ala i a latou galuega. O i latou uma e le o tusia o latou igoa i le Tusi o le Ola, faʻatasi ma Satani ma ana Agelu, ma le Manufeai ma perofeta pepelo, e lafoina i latou i le lepa afi o iai le taufaitagi aue ma le lilivau o nifo, o le oti faʻalua lea. (Mataio 25:46, Mareko 9:43-48, Faaaliga 19:20, Faaaliga 20:11-15, Faaaliga 21:8)

16. Le Lagi fou ma Lalolagi fou – "A e faʻatalitali i tatou i le lagi fou ma le lalolagi fou, pei o lana na folafola mai, e mau ai le amiotonu." (2 Peteru 3:13, Faaaliga 21, Faaliga 22)

Mafutaga Taʻitasi i totonu o le Ekalesia

I totonu o le Ekalesia, ua iai mafutaga ua atiʻinaʻe e lenei faʻalapotopotoga mo le lelei o le galuega a le Atua, ae ui i lea, e galulue faʻatasi mafutaga uma ia, ina ia manuia mea uma, ma ia faʻamatagofieina galuega fai poʻo tiute foi i totonu o le Ekalesia. Ma o mafutaga nei o loʻo galulue i totonu o ekalesia taʻitasi i le lalolagi atoa:

1. Mafutaga a le Aʻoga Aso Sa.

O lenei mafutaga e aofia ai tagata uma o le ekalesia, e amata mai i le 1 tausaga e oʻo atu i le 100 tausaga, afai e ova atu seisi i le 100 tausaga, ona le aofia lea o ia i le Aʻoga Aso Sa. O lenei mafutaga ua vaeluaina i ni vaega (divided by age). E iai foi le ʻau a tagata matutua, o le Aʻoga Aso Sa e tatau ona faia i le taeao o Aso Sa uma lava, vagana lava aso malolo o tamaiti i le aʻoga, ona malolo loa le Aʻoga Aso Sa, faʻatoʻa aʻe le Aʻoga Aso Sa i le taimi e aʻe ai Aʻoga a le fanau. E muamua ona faia Aʻoga tusi Paia a vaesga taʻitasi, e tusa la e tasi le itula o le Aʻoga Aso Sa. E uma aʻe le aʻoaʻoga o le Tusi Paia, ona faia loa lea o tauloto o vasega taʻitasi, e o e fai i luma o le faʻapotopotoga pei lava o se aitema (item) e tauva ai foi vasega taʻitasi mo le ipu o le Vasega e sili i le faʻaiʻuga o le tausaga i le taimi e faia ai le laugatogi a le Aʻoga Aso Sa. O le Komiti foi o le Aʻoga Aso Sa, e tofia ai le Peresitene o le Aʻoga Aso Sa, ma le failautusi, ma faiaʻoga taʻitasi.

2. Mafutaga a le C.A (Christ' Ambassadors) poʻo le Savali a Keriso

O nei mafutaga e vaeluaina ai le Ekalesia i vaega pe 3 pe 5, (e fuafua i le toʻatele o le Ekalesia) e tauva ai ʻau uma lava i le suʻesuʻeina o le Afioga a le Atua, o taʻaloga, ia ma le taulaga foi. O le Savali a Keriso (C.A) e faia i Aso Toʻonaʻi uma lava, e fai ai suʻega a le ʻau matutua ma le ʻau talavou foi. O suʻega foi ia, e maua ai sou togi pe a e pasia le maka 80% i le fonotele e faia i tausaga taʻitasi, i le Laugatogi Aoao. O le Laugatogi Aoao o se tauvaga faʻaleagaga a le ekalesia, e tauva ai ekalesia taʻitasi mo le ipu a le C.A. O le C.A e fai lava i le tausaga atoa, faʻatoʻa uma lenei mafutaga i taimi o le Tauvaga a le C.A e faia e Ekalesia taʻitasi, e tauva ai ʻau a le ekalesia i ni pese ma siva faʻaleagaga, e o mai ai foi nisi Ekalesia e matamata i sauniuniga a le C.A, ma le faʻamasino na te faʻamasinoina le ʻau e sili.

3. Mafutaga a Tinā

O le mafutaga a Tina, o se malosiaga lea i totonu o soʻo se tuʻaiga ekalesia, ona o le latou galulue faʻatasi, le teuina o le malumalu ae silisili, le latou naunau i le tatalo. E faia a latou fonotatalo i po o Aso Lua uma lava i le itula e 7 i le afiafi, o lenei lava sauniga e faia e atunuʻu uma lava, o le taimi e faʻafesoʻotaʻi ai Tina uma lava i totonu o le galuega, i soʻo se mea latou te aumau ai, i le Tatalo. Latou te mafuta faʻatasi i luma o le Nofoaliʻi o le Atua, ma tatalo mo le galuega a le Atua, ma e o loʻo taʻitaʻia le galuega. Faʻatoʻa faia a latou sauniniga i Aso o Tina, e tauaveina e Tina le Sauniga, e tātā foi latou i le faʻaili, e taʻitaʻia e latou sauniga, e fai ai foi ni o latou pese ma siva faʻaleagaga, ae le gata i lea, le folafolaina o le upu a le Atua.

4. Mafutaga a Tamā

O le mafutaga a Tamā, o se mafutaga malosi lava i le galuega a le Atua, ma o le mafutaga lea e aofia ai tiakono ma aʻoaʻo, ma tamā uma lava o le ekalesia. O se mafutaga tāua i totonu o le Ekalesia. O le ʻulu o matāfale taʻitasi. Latou te faia le galuega a le falesa, le teuina o fafo atu o le malumalu, ma e faia a latou fonotatalo i po o le Aso Gafua. Faʻatoʻa faia a latou sauniuniga i le Aso o Tamā, e tātā foi latou i le faʻaili, e tauaveina e latou sauniga, e taʻitaʻia e i latou sauniga lotu ma le folafolaina o le upu a le Atua, ma ni aitema poʻo ni viiga ua latou saunia e faʻamatagofieina ai a latou sauniuniga. O i latou e faʻamoemoe ai le galuega a le Atua e fai ai ni filifiliga saʻo ae le gata i lea ia loto maulalo.

5. Mafutaga a le ʻAu Talavou

O lenei mafutaga, o se mafutaga ola tele, aua o le lumanaʻi lenei o le ekalesia. O se mafutaga tupu tele, ma o le naunautaʻiga a lenei lava faʻalapotopotoga ina ia manuia le fanau, aua o i latou ia na te tauaveina le galuega a le Atua pe a mavae a tatou tuaʻā. O sauniuniga faʻaleautalavou, o ni sauniga faʻatumuina i le Agaga Paia, ni sauniga tumu foi, ma e pule lava le ekalesia i taimi e faia ai mafutaga a le ʻau talavou, o nisi e fai a latou sauniga i le po o Aso Faraile, o isi i le aoauli o le Aso Toʻonaʻi ma isi i le afiafi o le Aso Sa, o nei sauniga uma e faia i le gagana faʻasamoa ma le gagana peratania. E tauveina foi le ʻau talavou a latou sauniga, e faia foi mafutaga tele a le ʻau talavou (Youth Rallies) e auai uma ai ʻau talavou a ekalesia uma lava. O lenei mafutaga e tāua tele, e le gata i le faifeʻau, ma le ekalesia, ae tāua foi i luma o silafaga o le Atua. E lua vaega o le ʻau talavou, o le ʻau laiti ma le ʻau talavou matutua. E fai lava polokalame a le ʻau laiti, e ese atu foi i le ʻau talavou matutua. Faʻatoʻa o mai faʻatasi ʻau ia e lua i le aso o Lotu Tamaiti (White Sunday). E gaioi ʻau ia e lua e sauni atu ni viiga, ma siva faʻaleagaga, ae le gata foi i lea le folafolaina o le upu a le Atua. I taimi foi o fonotele a le Ekalesia e fai ai foi mafutaga a le ʻau talavou, ae faʻapitoa lava le fonotele a le lalolagi, e o mai ai autalavou mai itu e fa o le kelope, ma mafuta faʻatasi i le suafa o Iesu, i a latou sauniuniga ua faʻaigoaina o le World Samoan Assemblies of God Youth Conference.

Fonotele a le Lalolagi

O mafutaga tele a le Ekalesia e taʻitasi ona faia i tausaga e lua (every two years) ma e pule foi le Komiti a le Lalolagi i le mea e faia ai ia mafutaga. O ia mafutaga e fai ai Fonotaga a susuga i faʻafeagaiga ma faletua, e fai foi ma mafutaga o le aʻoga tusi paia, ma mafutaga faʻa-le-autalavou, e iai foi ma failauga faʻapitoa mo ia sauniuniga. O loʻo saunia foi e matagaluega taʻitasi ni aitema poʻo ni viiga i sauniuniga tuʻu faʻatasi i le afiafi.

E tusa la e tasi le vaiaso e faia ai ia mafutaga, o ni mafutaga faʻatumuina i le Agaga Paia, o ni mafutaga toʻatele foi.

Ma o le lisi lea o fonotaga ua teʻa, ma le fonotaga o le a tatou aulia i le faʻaiuga o lenei tausaga 2008.

1st Fonotaga a le Lalolagi 1978 na faia i Amerika Samoa.

2nd Fonotaga a le Lalolagi 1980 na faia i Hawaii.

3rd Fonotaga a le Lalolagi 1982 "Iesu le Faʻaola" na faia i Niu Sila.

4th Fonotaga a le Lalolagi 1984 na faia i Amerika.

5th Fonotaga a le Lalolagi 1986 na faia i Samoa.

6th Fonotaga a le Lalolagi 1988 "Ua Tasi tatou i le Agaga" na faia i Ausetalia.

7th Fonotaga a le Lalolagi 1990 "Taimi o le Seleselega" na faia i Hawaii.

8th Fonotaga a le Lalolagi 1992 "Ua uma ona ia totogi le tau" na faia i Niu Sila.

9th Fonotaga a le Lalolagi 1994 na faia i Samoa.

10th Fonotaga a le Lalolagi 1996 "Faʻamalosia e le Agaga Paia" na faia i Amerika Samoa.

11th Fonotaga a le Lalolagi 1998 "Le Aliʻi e, se faʻaaliga mo nei ma a taeao!" na faia i Amerika.

12th Fonotaga a le Lalolagi 2000 Tulaʻi ia, ina Malamalama ia" na faia i Samoa.

13th Fonotaga a le Lalolagi 2002 "O le mana o le Penetekoso" na faia i Hawaii.

14th Fonotaga a le Lalolagi 2004 "Tatalo ma ia Usitaʻi" na faia i Niu Sila.

15th Fonotaga a le Lalolagi 2006 "O le Penetekoso mo Augatupulaga uma" na faia i Samoa.

16th Fonotaga a le Lalolagi 2008 "Toe Faʻaolaola le Agaga o le Penetekoso" na faia i Niu Sila.

17th Fonotaga a le Lalolagi 2010 "Faʻamalosia e le Agaga Paia" na faia i Samoa.

Matagaluega Taʻitasi

Amerika Samoa

Taʻitaʻi Aoao: Pastor Siaosi Mageo

Ekalesia: 38

Samoa

Taʻitaʻi Aoao: Pastor Joe Amosa

Ekalesia: 98

Niu Sila

Taʻitaʻi Aoao : Pastor Motu Matia

Ekalesia: 55

Ausetalia

Taʻitaʻi Aoao: Pastor Onesemo Pulepule

Ekalesia: 48

Amerika

Taʻitaʻi Aoao: Pastor Tuʻugasala U. Fuga

Ekalesia: 76

Hawaii

Taʻitaʻi Aoao: Pastor Eteuati Lafaele

Ekalesia: 36

Alaska

Taʻitaʻi Aoao: Pastor Talosaga Vanilau

Ekalesia: 17

Nisi Ekalesia Penetekoso Samoa

E toʻatele nisi Ekalesia na amata i lenei lava faʻalapotopotoga, ae na ō ese e faʻatū a latou galuega, ae ui i lea, o loʻo tutusa pea talitonuga ma le Faʻapotopotoga a le Atua Samoa ma o loʻo faʻapea ona galulue faʻatasi. Ma o nisi ekalesia ia, e fai lava a latou fono:

Samoan Independent Assemblies of God in New Zealand
First Samoan Assembly of God in New Zealand
Assembly of God Church of Samoa
Malumalu Tele o le Faʻapotopotoga a le Atua i Lotopā, Apia, Samoa.
Samoan Church of God
Samoan Christian Churches
Samoa Worship Centre
Samoan Bethel Prayer Centre
Alofatunoa Pentecostal Ministries
Peace Chapel
Samoan Open Brethren Assembly
Au Uso Kerisiano
Voice of Christ, Samoan Church
Samoan Church of Pentecost
Bread of Life Samoan Church
Samoan Full Gospel Church
First Samoan Full Gospel Pentecostal Church Incorporated
First Samoan Body of Christ Church Incorporated
Worldwide Samoan Baptist Church
Samoan Hosannah Church
Samoan Breakthrough Church
Samoan Destiny Church