ʻO le Tusi a Mamona
O le Tusi a Mamona o se tasi molimau ia Iesu Keriso o loʻo faʻaaogaina e le Ekalesia a Iesu Keriso o Le Au Paʻia o Aso E Gata Ai poʻo le Lotu Mamona. O le Tusi a Mamona o se tuʻufaʻatasiga o tusitusiga a perofeta anamua sa nonofo i le konitineta o Amerika. E tusa ma talitonuga a le Lotu Mamona, sa filifilia ia perofeta ma sa taʻitaʻi i latou e le Atua. Sa latou valoʻia ma aʻoaʻo i tagata e uiga ia Iesu Keriso ma sa latou faʻatuina foʻi lana Ekalesia.
Ua faʻamaumau foʻi i le Tusi a Mamona le asiasiga a Iesu Keriso i tagata sa nonofo i Amerika. E tusa ma talitonuga o le Lotu Mamona, o tagata sa nonofo i Amerika i aso anamua o se tasi lala o le ʻaiga o Isaraelu. Ina ia faʻataunuʻu le fetalaiga o Iesu ua faʻamaumau i le feagaiga fou (Ioane 10:16) sa afio mai le Aliʻi Faʻaola i lana fanau ina ua uma lona afio aʻe i le lagi mai ana soʻo i Ierusalema. O le faʻamoemoe o le Tusi a Mamona o le faʻatalitonu i tagata o Iesu o le Keriso ma Mesia o le lalolagi.
Ua faʻamaumau ia perofeta ia faʻaaliga i la latou lava gagana i papatusi ua fai i auro. Ina ua oʻo mai le taimi na le toe i ai ni tagata amiotonu poʻo tagata sa talitonu ia Iesu Keriso (ua latalata i le 400 A.D.), sa poloaʻi le Atua i lana perofeta o Moronae e tanumia le papatusi i le ʻeleʻele.
E tusa ma talitonuga a le Ekalesia, I 1820 AD sa afifio mai le Tama Faʻalelagi ma lona Alo Iesu Keriso ia Iosefa Samita ina ia tali lona tatalo e uiga i le Ekalesia e tatau ona ia auai. Sa fetalai mai le Atua e le tatau ona ia auai se tasi aua ua liliu ese i latou uma mai le mea moni (2 Tesalonia 3:2). O lea, ua valaʻauina Iosefa e avea ma se perofeta ua taʻitaʻia e le Atua e toe fuataʻi lona Ekalesia sa i ai i aso anamua.
Ina ia toe fuataʻi le Ekalesia, sa taʻitaʻia Iosefa i le papatusi ua tanumia e Moronae. Na faʻaliliuina le Tusi a Mamona e Iosefa Samita mai se gagana ʻese i le faʻaperatania i le mana a le Atua. Ua faʻaigoa le tusi "O le Tusi a Mamona" aua o Mamona o le perofeta anamua na faʻaʻotoʻoto le papatusi.
Ina ua uma ona faʻaliliuina le Tusi a Mamona, sa faʻatu Iosefa Samita le Ekalesia a Iesu Keriso o le Au Paʻia o Aso e Gata ai i 1830 AD.